BUQA

BUQA — erkak qoramol. Gavdasi sigirga qaraganda balandroq, tana va ko’kragi keng, suyagi yo’g’on va mustahkam, terisi kalin, serharakat. Vazni sigirnikidan 30-40% og’ir, erkak buzoq urg’ochisiga nisbatan 3-5 kilogramm, yirik tug’iladi, 6-8 oyda jinsiy voyaga yetadi. Buqa uchun zotdor, sog’lom erkak buzoqlar tanlanadi. Sigirlarni qochirishda 14-18 oyligidan boshlab 6-8 yil, ayrimlaridan 12-14 yil foydalaniladi. Buqa yaylovda 40-50, qo’lda qochirilganda 100-150 sigirni qochirishi mumkin. Sun’iy usudda spermasi bilan 1000-3000, hatto 5000 sigirni urug’lantirish mumkin. Sigirlarni qochirishda 2 yoshgacha bo’lgan Buqadan oyiga 3-4 marta, katta yoshdagilardan haftasiga 2-3 martagacha foydalaniladi. Buqa spermasi (urug’i) vaqt-vaqti bilan tekshirib turiladi, sifatsizligi aniqlansa, qochirishga qo’yilmaydi. Buqalar uchun yaxshi sharoit yaratilib, protein, mineral modda va vitaminli ozuqalar bilan boqiladi. Ular yozda ochiqda, qishda maxsus binoda saqlanadi. Qochirishga yaroqsiz Buqalar go’shtga topshiriladi.