Goplitlar

Goplitlar (yunonlar hoplitai)-Qadimgi Yunonistondagi og’ir qurollangan piyoda askarlar (miloddan avvalgi V-IV asrlar). Ular uzun nayza, kalta qilich bilan qurollanib, qalqon, dubulg’a va sovut kiyishgan. Goplitlar 8 qatordan 25 qatorgacha saf tortib jips holda jangga otlanganlar. Jang paytida oldingi ikki qator jang qilgach, orqadagi qatorlar oldingilarni siqib turgan va safdan chiqqanlarning o’rnini to’ldirgan. Goplitlar o’rta mulkdor bo’lib, o’z hisoblaridan qurollanganlar. Miloddan avvalgi IV asrda o’rta mulkdorlarning xonavayron bo’lishi tufayli Goplitlar o’z ahamiyatini yo’qotib, asta-sekin yollanma askarlar bilan almashtirilgan.