Loyxo’raklar

Loyxo’raklar (Gallinago) – balchiqchisimonlar turkumiga mansub qushlar urug’i. 12 turi bor. Juda uzun tumshug’ining uchki qismidagi sezgir tanachalari ozig’ini topishga yordam beradi. Patlari tanasining orqa qismida sariq-qo’ng’ir, ko’kragi va qornida oqish. Yer yuzining hamma qismida tarqalgan. O’zbekistonda 5 turi: oddiy loyxo’rak, Osiyo loyxo’ragi, dupel, tog’va o’rmon dupellari uchraydi. Uyasini zax joyga quradi, 4 ta tuxum qo’yadi. Loyxo’raklar har xil mayda umurtqasizlar bilan oziqlanadi. Go’shti mazali. Ovlanadi.