Reket

Reket (inglizcha racket — qo’rqitish, do’q-po’pisa) — tovlamachilik, qo’rqitish, do’q-po’pisa, zo’ravonlik va boshqa yo’llar bilan biror narsa undirish. Odamlarni garovga olish orqali, avtomobillarni o’g’irlab egalaridan katta pul talab qilish kabilar Reketga kiradi. Reket dastlab Italiyaning Sitsiliya orolida paydo bo’lib, so’ng butun Yevropa mamlakatlariga yoyildi. AQShda zo’ravon tovlamachi gangsterlar Reket deyilgan. Sobiq SSSR hududida 80-yillarning 2-yarmidan boshlab yakka tartibdagi tadbirkorlar, kooperativlar, xususiy korxonalar, birjalar, savdo uylari, tijorat do’konlari paydo bo’lishi bilan Reket vujudga keldi. Reket og’ir jinoyatlar guruhiga kiradi. O’zbekistonda unga qarshi keskin kurash olib borilishi natijasida Reket bilan bog’liq jinoyatlar ancha kamaydi.