Shaxmat, shohmot

Shaxmat, shohmot (forscha Shohmot — shoh o’ldi) — sport turi. O’yindan maqsad raqib shohini mot qilish. Ikki xil (oq va qora) rangdagi 64 ta teng katakli taxta (sath)da ikki xil rangdagi 16 tadan dona (bittadan shoh va farzin, 2 tadan rux, fil va ot, 8 tadan piyoda)da o’ynaladi. Shaxmatda musobaqa paytida ma’lum sondagi yurishlar qilinishi uchun vaqt (dastlabki 40 ta yurish uchun 2,5, 2 va 1,5 soat va hokazolar) va o’yin tugamasa qo’shimcha vaqt belgilanadi. Tezkor Shaxmatda o’yinni tugatish uchun aniq vaqt (30, 25, 15 va 5 minutdan) beriladi. Sirtqi Shaxmatda har bir yurishni amalga oshirish uchun masofa va aloqa vositasi turiga qarab, kun yoki haftalar belgilanishi mumkin. Shaxmatning kelib chiqishi chaturanga o’yiniga borib taqaladi. Arab xalifaligi davrida bu o’yin «shatranj» nomi bilan ommaviylashdi. Arablar Shaxmat yozuvini joriy etgani uchun Shaxmat o’yinlari matniga oid qimmatli ma’lumotlar saqlanib qolgan. Abulfath Ahmad ibn Sijziy «Shatranj kitobi»da 819 yilda Xurosonda o’tkazilgan birinchi Shaxmat musobaqasi va unda g’olib chiqqan O’rta Osiyolik mashhur shatranjchi Abu Bakr as-Suliy haqida yozgan. As-Suliy ko’plab Shaxmat voqealariga qahramon bo’lib kirgan Abulfaroj Laylojga ustozlik qilgan. Shaxmat 11-asrdan boshlab Yevropada jadal rivojlandi. 15-asrda Shaxmat qoidalariga o’zgarishlar kiritildi. 1512 yilda Rimda Damianoning «bu kitob shaxmat o’ynashni o’rgatadi» to’plami bosildi va u Yevropa tillariga tarjima qilindi. 1575 yilda Madridda Ispaniya va Italiya Shaxmatchilari o’rtasida uchrashuv o’tkazildi. 17-asrda Joakkino Greko (Italiya), 18-asrda danikan (Fransua Andre), Filidor (Frantsiya), 19-asrda Govard Staunton (Angliya), Adolf Andersen, Iogannes Sukertort (Germaniya), Pol Morfi, Lui Paulsen (AQSh), Ignas kolish, Vilgelm Steynis (Avstriya— Vengriya), Aleksandr Petrov, Mixail Chigorin (Rossiya) kabi Shaxmat ustalari bu o’yinning rivojiga katta hissa qo’shishdi. 1851 yilda Londonda 1-xalqaro musobaqa uyushtirildi. Unda Andersen g’alaba qozondi. 1886 yildan shaxsiy jahon chempionati o’tkazilishi Shaxmatni yanada ommalashtirdi. 1924 yilda Xalqaro shaxmat federatsiyasi (FIDE) tuzildi. 1987 yilda tuzilgan Grossmeysterlar assotsiatsiyasi (keyin Jahon shaxmat kengashi, deb nomlandi) mustaqil ravishda Shaxmat bo’yicha bir qancha musobaqa, jahon kubogi va chempionati tashkil etdi. 2000 yilda Vladimir Kramnik va Garri Kasparov o’rtasida o’tkazilgan musobaqada Kramnik g’alaba qozondi va jahon chempioni, deb e’lon qilindi. FIDE Shaxmatdagi bo’linishga barham berish maqsadida mutlaq jahon chempionini aniqlash uchun birlashtiruvchi musobaqa belgiladi. O’zbekiston zaminida Shaxmat chuqur ildiz otganini tasdiqlovchi manbalar mavjud. 1972 yilda Dalvarzintepa (Surxondaryo) da olib borilgan arxeologik qazilmalar vaqtida Kushon davri (1— 2-asrlar)ga oid Shaxmat donalari, 1977 yilda Afrosiyob (Samarqand)da o’tkazilgan tadqiqotlar chog’ida 7-8-asrlarga taalluqli 7 ta Shaxmat donasi topilgan. 9-asrda yashagan Arab olimi va shatranjchisi aladliyning yozishicha, shatranjdagi inson tafakkurini cheklagan shashxoldagi xollarning tushishiga qarab yurish (shashxol) ning bekor qilinishi va bu o’yinning rivojlanishida O’rta Osiyo xalqlari muhim rol o’ynagan. Abu Rayhon Beruniyning «Hindiston», Abdurazzoq Samarqandiyning «matlai sa’dayn va majmai Bahrayn», Alisher Navoiyning «Majolis unnafois», «Lison uttayr», Zahiriddin Muhammad Boburning «Boburnoma» va boshqalar tarixiy asarlarda Shaxmat (shatranj)ga oid qimmatli ma’lumotlar bor. Amir Temur davrida quchli shatranjchilar Samarqandda to’planishgan. Tabrizlik Ali ashshatranjiy (Oloviddin at-Tabriziy) Samarqandda o’tkazilgan musobaqalarda g’olib chiqqan. Shatranj haqida kitob yozib, unga o’zining va 14-asrgacha O’rta Osiyoda yashagan ko’plab oliya (grossmeyster)larning mansubalarini kiritgan. U Sohibqironning o’zi bilan ham shatranj o’ynab turgan. 20-asrning 20-yillaridan O’zbekistonda Shaxmatning zamonaviy qoidalari keng targ’ib etilishi bu sport turining rivojlanishiga turtki berdi. Toshkent, Samarqand, Qo’qon va boshqalar shaharlarda Shaxmat to’garaklari ochildi. Azmiddin Xo’jayev, Sergey Freyman, Po’lat Saidxonov, Zokir Xo’jaev kabilar Shaxmatni targ’ib etishda jonkuyarlik ko’rsatishdi. 1930 yildan erkaklar, 1935 yildan ayollar o’rtasida O’zbekiston chempionatlari o’tkazila boshlagan (Aleksandr Grushevskiy va Larisa Pinchuk eng ko’p — 8 martadan chempion bo’lishgan). Turli davrlarda Fyodor duz-Xotimirskiy, salo Flor, Tigran Petrosyan, Paul Keres, Aleksandr Kotov, Mark Taymanov, Viktor Korchnoy, Anatoliy Karpov kabi taniqli grossmeysterlarning O’zbekistonga kelib, ma’ruzalar o’qishi, bir yo’la o’yin (seans)lar o’tkazishi, musobaqalarda qatnashishi mamlakatimiz Shaxmati rivojiga samarali ta’sir etdi. 20-asrning 50-yillaridan boshlab Mamajon Muhitdinov, Ulug’bek Elbekov, Sergey Pinchuk, Roman Kim, Alla Mkrtichan kabi Shaxmat jonkuyarlarining yangi avlodi voyaga yetdi. Respublika shaxmatshashka klubi foydalanishga topshirildi, turli toifadagi musobaqalar o’tkazila boshlandi, gazeta jurnallarda Shaxmat ruknlari, O’zbekiston televideniyesida Shaxmat ko’rsatuvi ochildi, Shaxmatga oid kitoblarni nashr etish yo’lga qo’yildi. Isaak Birbrager, Efim Ruxlis kabi Shaxmat kompozitorlari turli tanlovlarda g’olib chiqishdi. Georgiy Borisenkoga sirtqi Shaxmat bo’yicha xalqaro Gross- Meyster unvoni berildi. Georgiy A’zamov esa O’zbekistondan yetishib chiqqan 1-xalqaro grossmeyster bo’ldi (1984). 20-asrning 90-yillaridan O’zbekiston Shaxmatida yuksalish boshlandi. Erkaklar terma jamoasi jahon Shaxmat olimpiadasida 2-o’rinni egalladi (1992), Osiyo chempionatida g’alaba qozondi (1999). Ibrohim Hamroqulov o’smirlar o’rtasida jahon birinchiligida g’olib chiqdi (1998). Rustam Qosimjonov Osiyoning birinchi (1998), jahonning 17-chempioni (2004) bo’ldi. FIDE tasnifi bo’yicha jahon chempionlari V. Steynis 1886 — 1894 E. Lasker 1894 — 1921 X.R. Kapablanka 1921 1927 A. Alyoxin 1927 — 1935, 1937 — 1944 M. Eyve 1935-1937 M. Botvinnik — 1948 — 1957, 1958 — 1960, 1961 1963 V. Smislov — 1957 — 1958 M. Tal 1960 1961 T. Petrosyan — 1963 — 1969 B. Spasskiy — 1969 — 1972 R. Fisher 1972 1975 A. Karpov 1975 1985, 1993 1999 G. Kasparov — 1985 — 1993 A. Xalifman — 1999 — 2001 V. Anand — 2001 — 2002 R. Ponomaryov — 2002 — 2004 R. Qosimjonov — 2004 yildan Nufuzli musobaqalarda yuqori natijalar ko’rsatgani uchun FIDE quyidagi Shaxmatchilarimizga xalqaro grossmeyster unvonini berdi: Valeriy Loginov, Aleksandr Nenashev, Grigoriy Serper, Sergey Zagrebelniy, Saydali Yo’ldoshev, Aleksey Barsov, Mixail Saltaev, Rustam Qosimjonov, Rena Mamedova, Shuhrat Safin, Marat Jumaev, Dmitriy Qayumov, Timur Gareev (1992 — 2004). Bir necha Shaxmatchi va murabbiylar O’zbekiston Respublikasining faxriy unvoni va orden-medallari bilan mukofotlanishdi. Mamlakatda bolalar va yoshlar o’rtasida ham Shaxmatni rivojlantirishga katta e’tibor berilyapti. Shaxmat «Umid nihollari», «Barkamol avlod», Universiada musobaqalari dasturiga kiritilgan. O’zbekistonlik yosh Shaxmatchilar bolalaro’smirlar o’rtasida o’tkazilayotgan xalqaro musobaqalarda sovrinli o’rinlarni egallab kelishyapti. Hozirgi vaqtda Toshkent va viloyatlardagi Shaxmatga ixtisoslashgan bolalar-o’smirlar sport maktablari, Shaxmat klublari va to’garaklarida 268 murabbiy faoliyat ko’rsatyapti. Mamlakatimizda 7984 kishi (2320 nafari xotin-qizlar) Shaxmat bilan bevosita shug’ullanishadi, ulardan 3220 nafari Shaxmat razryad va unvonlariga ega (2003). Ad. .Muhitdinov M., O’zbekistonda shaxmatchilik, T., 1961; Muhitdinov M., Shaxmat — koni hikmat, T., 1994. Asror Mo’minov.