TRITONLAR

TRITONLAR (Triturus)— salamandrasimonlar oilasiga mansub dumli amfibiyalar urug’i. 9 turi ma’lum. Tanasining uzunligi 18 santimetrcha. Yevropada Osiyoning Yevropa bilan chegaradosh joylari va shimoliy Amerikada tarqalgan. Asosan, o’rmonlarda, odatda, toshlar, yiqilgan daraxtlar tagida va boshqa yerlarda qishlaydi, bahorda oqmaydigan yoki sekin oqadigan suv havzalariga o’tib, tuxum qo’yadi. Suvdagi mayda qisqichbaqasimonlar, mollyuskalar, suv hasharotlari, baqa uvildirig’i bilan, quruklikda esa o’rgimchaklar, hasharotlar va boshqalar bilan oziqlanadi. O’rta Osiyoda uchramaydi, ayrim turlari (masalan, Tarokli Tritonlar) akvariumda boqiladi.