ARANJIROVKA

ARANJIROVKA (Fransuzcha arranger -tartibga solish) — 1) musiqa asarini aslida nazarda tutilmagan o’zga cholg’u asbobi (yoki asboblar), xonanda (yoki xonandalar) ovoziga moslash; masalan, operani fortepiano jo’rligida ijro etish, orkestr uchun mo’ljallangan asar (simfoniya)ni bir yoki bir necha fortepiano uchun Aranjirovka qilish va hokazo. Muallif mo’ljallagan musiqa asbobining o’zida asar ijrosini osonlashtirishi ham Aranjirovka deyiladi; 2) jaz yoki estradada — bevosita ijro jarayonida kiritiladigan va ijroning uslubi bilan bog’liq turli (garmonik, fakturali) o’zgarishlar; 3) o’zbek xalq ijrochiligida keng o’rin olgan ashula yo’llarini cholg’u kuylar sifatida ijro etish (masalan, Surnap yo’llari) va cholg’u kuylarini ashulalashtirish («Munojot», «Cho’li Iroq», «Nasrulloyi» ashula yo’llari kabi) jarayoni Aranjirovkaga yaqin.