ASADOV MIRUMAR

ASADOV MIRUMAR (1927, Samarqand shahri) — me’morlik yodgorliklarini ta’mirlovchi usta, O’zbekiston qahramoni (1996). Samarqand yodgorliklarni ta’mirlash bilim yurtini tugatgan (1941). Tojikiston davlat untida o’qigan (1962 — 65). Toshkent shahridagi Alisher Navoiy nomli opera va balet teatri binosi qurilishida (1947), Tojikistondagi qator yodgorliklarni ta’mirlashda ishtirok etgan (1950 — 55). Asadov Samarqand shahridagi Ulug’bek madrasasi, Amir Temur maqbarasi, Bibixonim masjidi, Tillakori madrasa, shuningdek Buxorodagi Mir Arab madrasasi, Bahouddin Naqshband maqbarasi, Toshkentdagi Yunusxon madrasasi va Qaldirg’ochbiy maqbarasini ta’mirlashda qatnashgan. Asadov aka-ukalari usta Mirusmon, usta Mirsaidlar bilan birga tarixiy obidalarni ta’mirlovchi ustalar sulolasini tarbiyaladi. Asadov Hamza nomidagi O’zbekiston Davlat mukofoti laureati (1974).