O’RMON RESURSLARI

O’RMON RESURSLARI — tabiat resurslarining eng muhim turlaridan biri; mamlakat hududidagi o’rmon (yog’och) zaxiralari, yem-xashak, ovchilik resurslari, yovvoyi o’simliklarning mevalari, dorivor o’simliklar va boshqalarni o’z ichiga oladi. 20-asrning 80-yillaridagi ma’lumotlarga ko’ra, yer sharida quruqlikning 30% ni o’rmonlar tashkil etadi. Jahon bo’yicha umumiy o’rmon yerlari maydoni 4 milliard gektar, shundan yalpi o’rmonzorlar 3 milliard gektar; jami yog’och zaxirasi 356,7 milliard metr kub, har yili tayyorlanadigan yog’och miqdori 3 milliard metr kubdan ko’proq. O’rmonlarda yog’ochlarning yillik o’sishi 3,2 milliard metr kubni tashkil etadi. Lotin Amerikasi yog’och zaxiralarining ko’pligi jihatidan qit’alar ichida 1 o’rinda turadi. Rossiya, AQSh, Kanada va Braziliya yirik O’rmon resurslariga ega. O’rmon resurslarining asosiy qimmatli mahsuloti — bu sanoat va qurilishning ko’pgina tarmoqlarida ishlatiladigan, o’rmon daraxtlarini kesib tayyorlanadigan yog’ochdir. O’rmon resurslaridan sanoat usulida foydalanishda undagi daraxtlarning tur tarkibi katta ahamiyatga ega. O’rmon sanoatida yog’ochi yuqori sifatli bo’lgan ignabargli, yumshoq bargli va qattiq bargli daraxt turlari qo’p ishlatiladi, yumshoq bargli turlari (qayin, tog’terak, olxa va boshqalar)dan kam foydalaniladi. Yuqori sifatli qayin daraxtlari faqat faner, mebel kabilarni tayyorlashda ishlatiladi. O’rmon resurslarining daraxtlardan boshqa boyliklaridan muhimlari oziq-ovqat resurslari, yem-xashak resurslari (pichanzor, yaylovlar)dir. O’zbekiston o’rmonlarining muhim ekologik va himoya xususiyatiga ega ekanligi va yog’och zaxirasining kamligi (12 million metr kub) sababli sanoat asosida yog’och kesish ishlari olib borilmaydi. Hozirda farmakologiya sanoatida ishlab chiqarilayotgan tibbiyot preparatlarining 40% dan oshiqrog’i o’rmon daraxtlari va butalar po’stlog’i, bargi, mevalari, turli o’tlarning ildizidan tayyorlanmoqda. Respublikada 22 ta o’rmon xo’jaligi va 8 ta dorivor o’simliklar yetishtirishga ixtisoslashgan xo’jaliklarda 15 turdan ortiq shifobaxsh o’simliklar (polpola, anzur piyoz, moychechak, totim, arslonquyruq, bo’yimodaron va boshqalar) ekib ko’paytiriladi. Har yili mazkur xo’jaliklarda 450-500 tonnadan ziyod dorivor o’simliklar xom ashyosi tayyorlab, iste’molchilarga yetkazib beriladi. Kesilgan o’rmonlarga daraxtlar ekish, yangi o’rmonzorlar barpo etish O’rmon resurslarini qayta tiklashning samarali usuli bo’lib, o’rmonlarda ulardan uzoq muddat samarali foydalanishni ta’minlaydi. O’rmonlarning oziq-ovqat resurslariga qo’ziqorin, mevalar, yong’oqlar, iste’mol qilinadigan o’tlar, ildizmevalar, yovvoyi hayvonlar va ovlanadigan qushlar, shuningdek, asalari mahsulotlari, ozuqabop yem-xashak resurslariga tayyorlanadigan pichan, har xil o’tlar, hayvonlar iste’mol qiladigan mevalar kiradi. O’rmon asalarichilikni rivojlantirish, turli hayvonlar va qushlarning yashashi, oziqlanishi, ko’payishi uchun qulay muhitdir. Abdushukur Xonazarov.