“Sohibqiron” so’zining ma’nosi

Sohibqiron so’zining arabcha saodatli, zafarli, g’olib ma’nolari bor. Ilmi nujum (astrologiya)da va afsonalarda Zuhra (Venera) – do’stlik va mehru muhabbat tug’yonlarini in’om aylaguvchi, Mushtariy (Yupiter) – omadu iqbol, muzaffariyatu shodiyonalar sayyorasi deb ta’riflanadi. Shu ikki sayyoraning bir burjda uchrashgan vaqti saodatli lahzalardur, uni qiron deydilar, shunday vaqtda tug’ilgan bola o’sha qiron sohibi hisoblanadi. Bunday bolaning baxtli, ulug’ martabalar egasi bo’lishi oldidan bashorat etiladi. Sharq mamlakatlarida falakiqtidor hukmdorlarga beriladigan sharafli unvon. Amir Temur Ko’ragon ham shu unvonga musharraf bo’lgan.