YOQUBOV DADAXON

YOQUBOV DADAXON (1954.20.4, Jalolquduq tumani) — jurnalist. O’zbekistonda xizmat ko’rsatgan san’at arbobi (1990). ToshDUni tugatgan (1979). Ish faoliyatini telejurnalist sifatida boshlagan. «Hayot quvonchlari va tashvishlari» teleko’rsatuvi, «Navro’z» uzluksiz ko’rsatuvi bilan elga tanildi. 1992 yil may oyidan «Navro’z» xayriya jamg’armasi tuzildi va shu yildan Yoqubov jamg’armaning raisi. «Hayot quvonchlari va tashvishlari», «Muhabbat mavsumi» badiiy-publisistik kitoblarida insonni e’zozlash, milliy qadriyatlarni ulug’lash, «Navro’z» an’analarini keng targ’ib qilish, teran, ayni vaqtda oddiy ijtimoiy-falsafiy fikrlar orqali Vatanga muhabbat g’oyalari aks etgan. O’zbekiston Oliy Kengashi deputat (1990-95). «Mehnat shuhrati» ordeni bilan taqdirlangan (1999).