QADRIYAT

QADRIYAT — borliqdagi narsa, hodisalarning jamiyat, guruh shaxs ehtiyojlariga muvofiq kelishi yoki kelmasligi nuqtai nazaridan ahamiyati. Voqealikdagi muayyan hodisalarning umuminsoniy, ijtimoiy axloqiy, madaniy ma‘naviy ahamiyatini ko’rsatish uchun qo’llanadigan tushuncha. Inson va insoniyat uchun ahamiyatli bo’lgan barcha narsalar, masalan, erkinlik, tinchlik, adolat, ijtimoiy tenglik, ma‘rifat, haqiqat, yaxshilik, go’zallik, moddiy va ma‘naviy boyliklar, an‘ana, urf-odat va boshqalar Qadriyat hisoblanadi. Ijtimoiy jarayonlar ta‘sirida kishilarning Qadriyatlar to’g’risidagi qarashlari o’zgarib boradi. Tarixiy zaruriyatga qarab goh u, goh bu Qadriyat ijtimoiy taraqqiyotning oldingi safiga chiqadi. Masalan, yurtni yov bosganida – ozodlik, imperiya hukmronligi nihoyasida – istiqlol, urush davrida – tinchlik, tutqunlikda – erkinlikning qadri oshib ketadi. Qadriyatlar ijtimoiy-tarixiy taraqqiyot mahsuli sifatida o’z tarixiy ildizi, rivoji, vorislik jihatlariga ega. Qadriyatlar mehnat, ishlab chiqarish sohasidagi faoliyat, insonlar o’rtasidagi munosabatlar uchun foyda keltiradigan narsalar, hodisalar, xatti-harakatlar majmuasi sifatida yuzaga kelib, ayrim kishilar, ijtimoiy guruhlar faoliyati, xatti-harakatini ma‘lum yo’nalishga buradigan, tegishli me‘yorga soladigan ma‘naviy hodisaga aylanadi. Qadriyatlar umumbashariy, milliy, shaxsiy bo’lishi mumkin. Olam, tabiat va jamiyatning eng muhim tomonlarini, qonunqoidalarini, aloqadorliklarini ifodalaydigan Qadriyatlar umumbashariy xususiyatga ega. Bunday Qadriyatlar o’z ahamiyatini yo’qotmaydigan, abadiy Qadriyatlardir. Muayyan bir elat, millat, xalqning hayoti, turmush tarzi, tili, madaniyati, ma‘naviyati, urf-odat va an‘analari, o’tmishi va kelajagi bilan bog’liq Qadriyatlar milliy Qadriyatlardir. Inson, uning faoliyati, turmush tarzi, e‘tiqodi, umr ma‘nosi, odobi, go’zalligi bilan bog’liq Qadriyatlar shaxsiy Qadriyatlardir. Qadriyatlar komil insonni tarbiyalashda muhim omil bo’lib xizmat qiladi.